好多人開始為選購聖誕禮物頭痕，相信其中一個係陳方安生，事關陳太嘅親朋戚友加起上嚟有成80人，平安夜會喺佢屋企開party，每人買一份禮物，隨時買到出年都未買完，所以陳太同親友協議家規，同輩之間唔使咁客氣，只需送禮畀長輩同晚輩，但都唔嘢少，陳太要買50份禮物，少啲心思都唔掂。
早前因為十二指腸潰瘍而做手術嘅陳生逐漸康復，陳太透露老公最瘦時得108磅，所以目前首要增磅休養，陳太話會煲黨參畀老公補氣，仲用補酒浸腳，有助血液循環。陳生又有跟氣功師傅學氣功兼做治療，得閒亦會同孫仔孫女散步當運動。既然陳生病情好轉，陳太可以重新投入工作，早前押後嘅美加訪問之旅，預料明年中起行，到海外講特區民主實況。