星俠月初曾品題過中國澱粉（3838），當時股價約1元左右，至今剛好半個月，股價昨收報1.30元，累升達30%，讀者若有跟進及持貨至今，回報應不俗，推介總算唔失禮。
中澱銳意做大做強，研發液態糖項目，早前吸引多位省級高官走訪集團廠房。近日內地有傳媒報道，中澱正與中糧集團「行得好埋」，期望在澱粉業務上尋求合作可能，以晉身行業龍頭地位，有關消息不妨跟進，而該股獲利目標，由原來1.40元提升至1.60元。
講起中糧集團，上月中分拆自該系的中糧包裝（906），掛牌後表現可謂有目共睹，上周二股價最高曾見11.60元，有申購者可謂賺到笑。
近日股價雖由高位回落至9元樓下，但調整3日好快又重整旗鼓，昨日逆市炒上4.8%，收報9.58元，似乎係另一段升浪發動前之熱身，建議逢回吐跌唔穿9元就買入，作中線投資，跌穿8.50元止蝕。
母公司有大把零散包裝生意，可在未來幾年分批注入中糧包裝，而中國內需持續增長，中糧包裝生意唔愁，前景看好。
方星俠