自從現代美容（919）前主席曾裕舊年以「健康理由」，唔再做集團生招牌後，成間公司都好似立立亂咁。由今年9月開始，董事會嘅人換完一個又一個，今個月仲試過一星期內有3位獨立非執行董事請辭，本來人事變動係平常事，不過，連老臣子袁少萍都同公司鬧翻，成件事就真係耐人尋味。
現代美容噚日公佈，罷免執行董事袁少萍嘅職務，即日生效，通告話因為袁小姐未能履行執董職務，而且佢嘅業務目標同公司唔一致，所以認為佢會對公司嘅經營造成負面影響。
袁少萍18歲加入做了16年
華華仲記得，以往每次現代美容搞活動，曾裕同袁少萍都會好似孖公仔咁見記者，業績會如是，開分店亦如是，估唔到曾裕一離開主席位冇耐，改由老公李守義頂上後，袁小姐就會同公司出現「不一致」。
空穴來風，未必無因。原來雙方早有爭議，但都係喺曾裕退落嚟「休養」，由老公李守義接手做主席之後嘅事。現代美容通告話，早喺今年10月，袁小姐向平等機會委員會對公司作出申訴，現時公司亦同佢喺勞資審裁處互相向對方作出申索，至於雙方拗啲乜，公司只係話適當時會進一步公佈。
翻查09年報，袁小姐自93年起已加入公司，屈指一數，當年應該只有18歲，至今16個年頭。現代美容聽日公佈中期業績，唔知到時會唔會有管理層出嚟解畫呢？
李華華
mailto:[email protected]