中央經濟工作會議後，不但冇好消息，反而喺內房股爆升之際大潑冷水，推出四招壓樓市，仲點名批評大城市政府幫手炒起地價，要大力整治。內房股即時散晒，大至龍頭中國海外（688）穿頭破腳，細隻至綠城中國（3900）一支大回馬槍，升勢通通被洗劫一空，但走勢仲未走樣到內銀股咁，投資者要小心，但唔使過份擔心。
睇番中央財經委副主任接受中央台訪問時，話自己以副部級官員嘅人工，都買唔起「像樣」嘅樓，老百姓又點負擔得起！上兩個月香港有醫生律師都話買唔起樓，係買唔起定負擔能力跟唔上眼光？主任呢番咁體察民情嘅說話，雖然係謙咗少少，但中央要畀公眾嘅訊息係要遏阻炒樓，而唔係叫人唔好買樓。看官要搞清楚兩者關係，唔係早前就唔會延長營業稅兩年限期嘅優惠。值得留意係有關措施公佈實施之前，樓市成交有升無減，反映用家趕緊執平貨，「剛性需求」好強。
有助民企毋須高價爭地
其實中央一再強調，針對嘅係「個別」瘋狂城市，仲提出嚴防國企炒地，矛頭似直指北京、上海等地方大型國企。可惜上有政策，下有對策，地方政府炒起樓價，都係為增加政府稅收，如今洗濕個頭，最頭痕應該係大龍地產呢類野心勃勃嘅國企，而唔係擔心樓價會大幅下滑。因為一來樓價跌會對民生有直接影響，破壞經濟復蘇勢頭；二來大國企已買入天價地皮，樓價大跌會造成一大批爛尾盤，點同上頭交代。
既然財經委官員已點名提醒大城市幹部要醒醒定定，預期再刻意抬高地價嘅惡行應該會收斂，國企同民企爭地嘅「惡性競爭」將會紓緩，有助現金水平充裕嘅發展商以合理價格吸納土儲。上市時標榜「最民企的民企」嘅龍湖地產（960）、百仕達（1168）、寶龍地產（1238）等正係呢一類。上個月佢哋投北京地王時已同大龍交過手，當時龍湖見第一口價已升高一倍，連舉手都費事，得寶龍同佢鬥到入最後大直路，結果都係呢間大龍以「癲價」50.5億元人民幣投得。中央要捉鬼，明顯唔係針對正常做生意嘅發展商。
胡孟青