康師傅（322）發行嘅台灣預託證券（TDR）今日掛牌，公司最高領導人魏應州（圖）噚日喺天津總部見傳媒，再次講到接班人問題，魏董話，諗住4年後屆花甲之年就退休，並且已經開始為接班部署，總之唔會令投資者操心。
魏董有3位公子，長子宏名同幼子宏丞已經喺康師傅做緊主管，兩個仔子承父業都係一個唔錯嘅安排。
魏董又講到集團發展，佢話糕餅產品係公司弱項，家搵緊收購機會，藉此擴大規模；之不過咁，搵唔到嘅話，佢唔排除將呢瓣生意賣畀人。至於未來增加資本支出，佢話要成5億美金，較今年大幅增加近九成，佢話：「沒有規模就搞不下去，商場如戰場，不是你死就是我活！」果真係大商賈風範！