薩爾達喺NDS推出新一集，美版已到港，叫《TheLegendofZelda:SpiritTracks》，日版則叫《薩爾達傳說：大地之汽笛》，只係語言唔同及早出遲出嘅分別；不過美版副題「SpiritTracks」貼切得多，今次薩爾達公主將破天荒同林克齊齊冒險，雖然只係靈魂附體玩神交，都好過無！
記者：阿洛
沒有軀殼的靈魂
《大地之汽笛》係《夢幻沙漏》嘅續篇作品，同樣承襲《風之律動》嘅Q版卡通風格，有對貓眼嘅Q版林克個樣相當得戚。
故事中林克受薩爾達公主請求而偷偷帶公主離開城堡進行火車冒險，點知公主卻遭到神秘敵人用法術攻擊，身體被敵人擄走，得番個靈魂。而為咗取回身體，公主靈魂就附身喺幻影盔甲武士身上，同林克齊齊冒險。
幻象似的愛情
今次玩法講求合作，例如一開始林克就要負責引開守衞注意力，而玩家就要規劃出薩爾達公主的偷走路線離開城堡。而當公主上咗盔甲武士身後，又可以利用硬淨盔甲同極大力氣為林克解除唔同機關。
相反，如果公主見到最驚嘅老鼠時，林克就要幫公主解圍。隨住故事發展，公主嘅靈魂仲可以附體喺唔同嘅幻影身上，繼而發揮出唔同的特殊技能。
火車仔多才技
今次除咗傳統迷宮冒險外，仲可以揸蒸氣火車四圍玩，目的係恢復消失嘅鐵路擴展版圖。而林克今集繼續會有好多武器可以用，例如可以吹奏出特殊效果嘅「大地之笛」，仲有用筆篤出飛行軌迹嘅回力鏢，鞭鞭有力嘅蛇鞭及吹出旋風嘅風車等等。
Profile
遊戲：《薩爾達傳說：大地之汽笛》
機種：NDS
製作廠商：任天堂
類型：動作
人數：1人
