舊年爆發金融海嘯，地產代理要大裁員救亡。事隔一年，經濟好轉，樓市大旺，代理行理應請人都請唔切，但華華聽聞美聯集團（1200）後勤公關部噚日就一日內走咗四個公關，唔通個勞工市場真係咁好景，挨年近晚，連分花紅、派雙糧都唔等，趕住走人。
華華聽江湖傳聞，今次走嘅四人，係分別負責港島、九龍、新界及測量部嘅公關，噚日同日離職。美聯貴為本港地產代理上市公司，員工以千計，單日有4名員工離職，可能只係小數目，之不過，外間對一日唔見咗四個公關咁橋，就嘖嘖稱奇，有冇咁啱呢？
聽佢哋美聯消息講，間公司規模咁大，走咗幾個人對內部運作唔會構成影響，其他員工應付日常運作應該絕冇問題咁話。但華華就覺得唔多唔少都會影響士氣，主席黃建業要唔要做番啲嘢，振奮員工呢？