香港打入東亞運足球決賽，事前未必有人想得到，上星期五晚，馬主Ｎ急call左丁山：「喂，星期六一齊去睇波，為香港隊打氣！」左丁山話：「冇買飛喎！」馬主Ｎ講：「球票包在我身上，你出聲就得。」幾乎心郁郁，但星期六早上有國際馬匹拍賣會，下午去睇波，晚上要參加森哥娶新抱晚宴，星期日下午又有國際大賽兼經紀Ｋ嫁女，節目一個連一個，辛苦啲喎，諗咗一輪，忍痛割愛，情願留在屋企睇直播。
場波緊張而不精彩，日本派青年軍來港，與港隊打成均勢，踢到加時，仍然係一比一，過咗晚上七點嘞，冇時間等，奪門而出，坐的士趕去四季酒店，司機聽緊收音機講波，一聽見香港歐陽耀沖射失，大嗌一聲：「死嘞，打窒條氣，輸咗九成九！」大家一齊緊張，出咗尖山隧道，聽到日本輸波，香港得金牌，幾乎想同司機嚟個「舉手擊掌」，不過立即想起，人哋揸緊車o架，急忙縮手。
馬主Ｎ電話即到：「呀，我地嗌到聲都沙晒，你真係走晒寶，香港好耐冇咁威過！」左丁山話：「喂，人哋派二流隊伍參賽咋噃，我哋贏咗都唔算威啫，上次日本世界盃國家隊陣容咪數到香港七個一皮！」馬主Ｎ反駁：「唓，贏就係贏，又唔見中國嘅國足三隊可以贏到金牌！」馬主Ｎ冇話唔啱，東亞運本來平平無奇，不受重視，香港亦冇乜人理會，點知足球隊竟然贏到金牌，並吸引三萬幾人到大球場高呼WeAreHongKong，咁就令主辦單位面上貼金，勝利完成任務。
以前董特首曾組織一個「社會凝聚力委員會」，委任關信基教授為主席，關教授諮詢過好多人，包括左丁山在內。左丁山向關教授建議政府多撥資源改進香港足球訓練，培養新人，理由簡單不過，就係足球為大眾化運動，如果香港隊能有技術體能俱佳嘅球員在國際賽踢出好成績，譬如打入亞洲盃決賽周，就會加強香港社會凝聚力。左丁山人微言輕，當時講完就算，凝聚力委員會亦無疾而終，嗱，現在睇到啦，一個小小東亞運足球金牌就激發香港人團結高呼WeAreHongKong，特區政府以前出盡九牛二虎之力，都冇法子凝聚到呢股力量。曾特首在現場高舉雙臂，聽得清楚，希望以後香港足球隊租場練波之時，唔會再俾康文署人員呼趕！