在全球環保趨勢下，混能車、電動車已成未來汽車業新趨勢，不過講車當然唔少得電單車，警方早前先買咗批Vectrix電羊試用，而另一款電動電單車EnertiaBike亦剛登陸。兩者同係產自美國，如果話Vectrix係走實用路線，咁EnertiaBike就屬悠閒型，專職陪你返工放工加埋四圍玩。
記者：趙慧敏
攝影：譚盈傑
Model：Chimpy@PureModels
以前一聽電動電單車，總會覺得馬力唔夠，外形笨拙，不過Vectrix嘅出現，似乎話畀大家知，電動電單車嘅發展都去到另一個新領域。警方都可以大膽試用，馬力自然唔會弱得去邊。至於外形，EnertiaBike就係環保車都型得起嘅代表。驟眼睇EnertiaBike確實同一般爬山電單車有幾分相似，車身偏高，顏色又搶眼，明顯係以年輕人為銷售對象。
車身物料可循環
EnertiaBike係美國車廠Brammo首部產品，車架以鋁合金製作。既然係電動車，電機及6組電池便是整部車嘅靈魂，而這靈魂部份，集中於車身位置，利用鏈條傳動車輪，前後制動都是用上碟剎。操控基本與一般電單車相若，右邊手掣負責加速及前制動；左邊則負責尾制動。至於較一般電單車少咗啲乜？就係離合器及波箱，當然仲有用作排廢嘅死氣喉。既然說是環保，設計上當然以環保為大前提，所以EnertiaBike除咗係零廢氣排放外，車身物料有90%以上都可以循環再用，就算他日電單車報廢，都可以廢物再用。不過環保之餘都要講性能，據廠方提供資料，EnertiaBike嘅極速是95km/hr，充滿電後，大約可行走70公里，以香港環境而言，用作代步算是十分合適。
最啱Show靚腿
EnertiaBike結構較為簡單，故此重量只有145公斤，較一般電單車輕，重量都集中在6組電池上，而廠方今次所使用嘅電池，並非一般鋰電，而是磷酸鋰電池（LithiumPhosphateBattery），這種電池穩定性較強。插頭設於座椅下位置，要充滿大概4小時，為了保證電池運作正常，EnertiaBike有一套BMS（BatteryManagementSystem），負責監控電流及6組電池嘅消耗量，資料會在車頭顯示屏Show出。至於電池耐用性，據廠方資料，大約充電2,000次便要更換。EnertiaBike家仲係喺申請牌照階段，所以仲未能於路面正式試車，不過於私家路段稍作測試時，發覺EnertiaBike除咗寧靜及零廢氣外，反應都算好快，尤其加速方面。仲有一個大家估唔到嘅優點，就係因為電池沒有引擎般高溫，不會出現揸一般電單車時可能有嘅灼大腿情況，這優勢可能十分吸引愛穿短褲嘅女車手。
規格
電機類型：高性能電動車馬達驅動控制器
最高時速：95km/hr
電池：磷酸鋰電池
充電時間：4小時
每次充電可行里數：約70公里
售價：約$90,000（未正式定價）
查詢：JCAM（26248899）