白鴿黨近幾個月頭頭碰着黑，唔係甘威醜聞俾人砌，就係總辭爭拗俾人鬧，終於有單好事冲喜吓。涂謹申同蘇麗芬（Sue）拉埋天窗，上星期六舉行簽字儀式，前晚擺酒，好多官商名人現身，連小小超都有嚟影相，白鴿黨都算有飛士。
阿涂喺婚宴上好老實，話最初鍾意阿Sue靚，甚至唔敢正眼望佢多過半秒；阿Sue則自嘲因為愛心爆棚，所以看上阿涂，又笑言愛向難度挑戰，想完成「改造涂謹申」大project，結果都幾成功，雖然阿涂未至於脫胎換骨，但真係唔同晒。
甘威攬住老婆唱情歌
嫁雞隨雞，嫁鴿就要隨鴿，做白鴿黨阿嫂真係唔容易，當晚八個白鴿黨阿嫂齊集，歷史性場面難得一見。唔使講都知，同白鴿黨人一齊，段段關係都有可歌可泣嘅故事。新阿嫂阿Sue入門，當晚李華明、單仲偕、黃成智、楊森、鄭家富、甘乃威同李永達七個老婆一齊上台，同阿Sue共八個阿嫂合唱《難得有情人》，八個老公十分識做，立即上台獻花，甘威更加攬住老婆唱情歌，表現得最恩愛。
高達則話，老婆陳樹英一定係佢背後的女人，事關如果佢企喺陳樹英後面，就冇人見到佢。做白鴿黨人背後的女人，八方覺得佢哋犧牲精神可嘉，首先要有絕足大陸嘅心理準備，因為佢哋好多位都係「無證人士」，就算有，都隨時被沒收，過關被打回頭都唔出奇！
其次係分分鐘要承受醜聞打擊，白鴿黨成員過往被指嫖妓、包二奶，甚至性騷擾都有之，尤其四年一度選舉年係高危日子，嫁着個咁嘅老公，真係少啲膽汁都頂唔順。從政表面風光，實際上似打四年長散工，老公開會開到天昏地暗，日日落區唔黐家，隨時見街坊多過見家人，做家訪時間多過留喺屋企，萬一競選落敗就飯碗不保，即時要執包袱起身，所以想食安樂茶飯嘅話，嫁白鴿黨議員前真係要三思，反而嫁入民記就穩陣得多，話晒有國家照顧吖嘛！
新阿嫂強調冇揀錯人
雖然嫁入白鴿黨風險高，不過阿Sue強調冇揀錯人，因為發覺阿涂有白鴿黨嘅特質，就係堅定可信，係可託付終生嘅人。
mailto:[email protected]