剛完成索馬里護航任務嘅解放軍529護航編隊艦艇「舟山號」同「徐州號」噚日訪港，停泊喺昂船洲海軍基地，今日起一連三日開放畀公眾參觀。煲呔梗係唔執輸，噚日率先登艦，仲發表咗篇語調相當慷慨激昂嘅歡迎辭，激昂到八方聽到有啲毛管戙。
兩艦曾護送582艘船
煲呔首先話，代表特區政府同香港市民，熱烈歡迎海軍政委劉曉江同編隊全體人員，亦不忘多謝中央同中央軍委應特區政府邀請，安排編隊返航途中停靠香港。佢跟手就亂拋書包，由600年前鄭和（三寶太監）率領船隊遠航、開闢海上絲綢之路講起，話600年後今日，中國海軍遠征鄭和當年到過嘅亞丁灣、索馬里海域，肩負比鄭和更艱巨嘅使命，就係為中國商船護航！
煲呔然後用好普通嘅普通話，繼續大讚海軍展示咗「和平文明之師」風采，贏得國內外廣泛支持同讚譽，又話「我們與有榮焉，為中國海軍而驕傲。」最後佢話要代表香港市民特別係香港航運界，向護航編隊全體官兵致以崇高敬意。
人哋海軍特登嚟香港訪問咁畀面，作為主人家係應該熱情款待，但擦鞋有時要有技巧。首先唔講煲呔措辭冇新意；大佬呀，形容解放軍護航勁過鄭和下西洋，係咪有啲九唔搭八呢？
都係講番兩艘艦艇，今年8月佢哋喺索馬里海盜猖獗嘅亞丁灣執行護航任務，其間護送咗582艘船，係解放軍一項紀錄。護衞艦長134米、寬16米，備有多款新型武器，包括具隱身功能嘅單76艦炮，能夠對潛艇進行攻擊嘅3200火箭深彈發射裝置，仲有直九型艦載直升機。
逾四千門票已派清光
海軍特種兵噚日喺甲板上列隊亮相，當局安排咗班學生哥揮旗仔歡迎。班小學生上船參觀嘅時候，猛咁影相，開心過去迪迪尼。不過，家先想去參觀呢兩艘艦艇嘅市民可能要失望，因為四千幾張門票一早已經派清光。
mailto:[email protected]
