律師會會長王桂壎年輕時入過律政署，80年代尾調過去立法局做法律顧問。王會長話自己嗰時只係個o靚仔，見到前輩如馬丁咁都好鬼怯，仲話當時馬丁見到佢呢個死o靚仔都當佢冇到咁滯，眼尾都冇睄佢一下。
直至一次，馬丁忽然叫佢畀法律意見，雖然騰騰震，但佢都講咗自己嘅分析，順利過關後返入房，點知馬丁忽然喺佢房外出現，讚佢頭先畀嘅意見好中肯，流晒汗嘅佢至鬆一口氣。最好笑係嗰時馬丁先問佢叫乜嘢名，唔通之前冇發現佢嘅存在？自此以後王桂壎同馬丁都不時傾偈，馬丁仲鼓勵過佢轉做大律師。到89年王桂壎離開立法局，之後涂謹申當選議員，佢話當時有人問佢係咪有個失散兄弟，事關阿涂同佢好似樣喎。