鄭秀文（Sammi）喺平安夜開始舉行演唱會，啲飛早已經爆滿，而且內部認購仲超出咗好多，主辦機構都為咗分飛問題好頭痛，左思右想下，只好向訂咗飛嘅人cut飛，但聽聞就唔會cut無綫三大巨頭陳志雲、樂易玲同何麗全嘅飛，據知呢三大無綫巨頭每人訂飛都超過300張，但東亞就對佢哋特別照顧。
或加開PartII
東亞娛樂初時都冇諗過Sammi啲飛可以爆得咁厲害，所以上年訂場地時，的確係諗住開10場左右，因為老闆林建岳都擔心Sammi嘅體力應付唔到，家場場爆滿，好多人問會唔會開第二Part，主辦機構都有呢個意思，但都要有場地先至有得做，所以唔係話想開就可以開。噚日打電話畀東亞宣傳大員梁小姐，佢話：「我唔多清楚無綫大員訂飛情況喎！盡可能我哋都唔希望cut大家嘅飛，所以呢排為分飛嘅事都好頭痛。」