大市連續幾日收低於50日線之下，噚日上晝繼續扮死，再質穿近期低位，散戶絕望之餘，更受到傳媒專家一面倒睇淡大市的影響，有部份甚至大玩拼圖，將過去類似市況作比較，得出個市必死無疑嘅結論。聽吓無妨，若信晒大手沽，挾到手指都痛。
早前已大膽假設中東佬玩嘢，陰謀論話一早沽空全球股票再出壞消息，阿布扎比夾埋口供話唔肯包底，結果將全球股市（包括中東自己）一下子打散晒；突然阿布扎比政府又出手支持，喺票據到期日前夕無條件向杜拜世界提供100億美元資金，阿聯酋央行更話會全力支持。人家本是同根生，早就話會救，只係市場要搵藉口、分析員要保飯碗，跟風向搖風擺柳，投資者最緊要分清市場邊啲係聲音，邊啲係雜音。
其實上午有部份股份係披住熊皮嘅牛，喺指數仲係跌緊時，密密創新高，基金大戶趁市亂一路吸貨。例子有成交大旺嘅龍源電力（916）、上周提過跌無可跌嘅中石化（386），升至密集蟹貨區嘅鋼股，仲有全日高踞升幅榜嘅北京建設（925）。
料成北控集團基建旗艦
北京建設前身係做家居及庭園裝飾嘅元昇國際，殼股一隻，喺5月獲北京控股（392）阿媽北控集團以每股0.15元認購50.1%權益，7月再獲嘉里以每股0.5元入股6.17%。話明係殼，上半年虧損擴至2227萬元都仲有咁多人追入，睇緊係北控媽媽會點樣湊大佢。北京建設家姐係大家熟悉嘅北控，目前控有系內多間上市公司股權，包括北控水務（371）、北京發展（154）、北京燃氣、燕京啤酒、首都機場（694）等，係阿媽嘅基建同內需旗艦。
當年湊大392上市嘅京泰實業，係北控集團嘅全資直屬窗口公司，有38間全資或參股企業，包括華遠地產、北控磁懸浮技術發展公司、北京陸港物流等，仲有貿易、食品加工同旅遊公司，通通都有機會注入北京建設。
392喺97年上市招股價係12.48元，至今有3倍以上進賬；925開車冇耐，趁回吐買入，但冇耐性者免問。
胡孟青