中大新聞傳播學院自二○○三年起，每兩年舉辦一次中大新聞獎，眨吓眼已經辦到第四屆，十二月七日在皇朝會坤寧閣舉行頒獎禮。左丁山應邀到場，一入場就碰到阿仁哥，問佢來此為了何事？仁哥大大聲話：「我報記者得獎吖嘛！」夥計攞獎，唔怪得老總到場打氣，《蘋果》之得獎作品乃財經版首席記者劉美儀之「人民幣強勢升值」（○八年初），當時劉美儀緊跟事態發展，首先披露升值新聞。劉美儀於一九九○年浸大新聞系畢業，做咗十九年記者，已屬阿姐級，銀行大公關華德話：「May姐識勻全港銀行高層，對金融新聞最熟，好權威o架！」
細看得獎名單，分電台、電視、文字媒體三組，十位得獎人之中，浸大新聞系畢業生佔咗六位，（劉美儀、呂秉權、林穎茵、陳偉利、張一華、朱錫君），上海外國語大學畢業生一位（趙旭），中大新聞系畢業生三位（潘達培、黃雅麗、鍾慧儀）。於是特登問籌委會主席黃麗君：「乜中大新聞系頒獎，浸大新聞系攞咗六成呀？」黃麗君話：「證明中大新聞系有胸襟啫。」係嘅，辦新聞大獎，最緊要有公信力，評判不能偏私。聽評判之一燦哥講：「所有參賽作品只有編號，冇人名，冇新聞機構名，評判完畢之後，先知道有六位得獎人係浸大畢業生。評判團之中，絕大部份係中大出身嘅總編輯，只有一位黃煜教授係浸大人，可見評判十分公正公道，純粹以記者新聞報導質素為標準。」
今年出席頒獎禮嘅人士特別多，除眾位得獎人之外，好似係召開中大新聞系校友會。律政司司長黃仁龍做頒獎嘉賓，頒獎之前致辭，本以為佢講幾句客套話就算數，點知司長甚為認真，講辭經過一番細心研究，值得一讚（原文已由新聞署發佈）。黃司長以兩個J（JournalistsandJustice）為主題，講及記者與公義。左丁山向黃司長開玩笑：「司長講JJ，下面君悅酒店就有間JJ，不妨落去飲番杯。」JJ開幕之時，曾經紅極一時，門口晚晚有人排隊，不過現在已經無此現象咯！講認真啲，黃司長論及記者與律師之角色，記者發掘真相之專業精神，係罕見之官員用心之作，值得一讚。