睇史特加門將列文打波，真係好似睇緊功夫片甚至荷李活驚慄片，皆因佢周不時動粗或做啲令人嚇餐死嘅事，打波好似想殺人咁款。繼上星期歐聯涉嫌喺廣告板小解後，前日喺史特加作客緬恩斯場波又失心瘋，完場前踩人被逐離場兼輸12碼，累己累人。40歲人，因乜解救仲未曉收火呢？
剛戰冇厘頭踩人出場
史特加乘歐聯晉級之勇，前日場波好早就由普格恩耶克入波領先，諗住有機會贏得近9場聯賽首場勝利啦，點知到87分鐘，佢喺冇壓力情況下忽然一腳踩去對方前鋒艾斯泰迪賓斯度，搞到自己領紅牌罰離場，隊波仲輸埋12碼，對方一句多謝都冇就由波蘭斯基主射扳平。就係咁，史特加平白唔見咗兩分。
比賽中途小解被人炮轟
話晒列文打過德甲、意甲、英超幾間大球會，佢嘅惡行，遠至效力AC米蘭時因拳打對方球員被罰停賽，以至今次踩人，都算人所共知。
淨係講佢近年經常口不擇言批評球會高層同埋隊友，已經「犯眾憎」，而佢又因為住處遠離練習場，所以搵私人直升機代步，造成巨大噪音，對附近居民造成嚴重滋擾。呢啲都未夠衰，話說佢上星期歐聯主場以3:1勝烏尼雷亞比賽期間，被拍到喺廣告板後鬼鬼祟祟，狀似小解，明知大型比賽必有直播，又明知身邊有無數攝影機，佢係都要作不雅之舉，抵俾人炮轟。
衰口多又唔肯交球會罰款
好嘞！佢之前已經因批評球會解僱前任教練巴布，被罰款但唔肯交，今次就踩人影響球隊利益，據報離場後仲同一個球迷發生口角，繼而扯甩人哋副眼鏡。
球壇惡人見得多，惡到佢咁就好少見，亦怕且冇人會再救到佢。「我清楚佢擔任球員嘅特點，但完全未清楚佢嘅為人，我會細心研究今次事件。講到尾，球隊成績大過天，唔應該受一個人嘅行為影響。」聽教練高斯咁講，列文呢次應該有手尾跟，要為自己嘅癲狂行為付出代價。