明明係一個蚊型運動會，包括跳水皇后郭晶晶同欄王劉翔兩位國寶都紆尊降貴，相信冇人會估佢哋係為咗呢面金牌而嚟，反而受委派嚟撐場嘅原因就明顯好多，試問冇咗郭晶晶同劉翔嘅東亞運，仲會有咁多市民留意？唔少比賽場館一張張嘅空凳就反映到東亞運有幾咁「受歡迎」；如果冇咗晶晶同劉翔掀起高潮，八方都戥東亞運公司擔心，最驚市民只係記得東亞運搞到幾咁差。
大讚霍家未來新抱
正所謂施恩莫望報。相信聽中央指令嚟香港撐場嘅晶晶同劉翔，唔介意成為東亞運宣傳工具，但東亞運有限公司似乎唔係咁諗，覺得國寶級人馬畀面嚟表演，唔回饋一下唔禮貌，所以特別為佢哋兩位度咗「抒情式」新聞稿，用盡各種詞彙大讚佢哋嘅出色表現，睇到唔少人毛管戙。
最明顯嘅莫過於晶晶噚日明明同拍檔吳敏霞一齊攞到跳水金牌，但係東亞運公司發出嘅新聞稿，標題只有郭晶晶大名，讚佢「續寫跳水傳奇」，然後就係一堆讚美詞，例如寫「郭晶晶冒出水面，爬出池邊，鎂光燈閃個不停，觀眾報以如雷貫耳的掌聲，她向拍檔綻放了熟悉的笑容，準備迎接頒獎禮」，又大讚佢「依然故我、面露笑容、邁步向前」，根本就似個人宣傳稿多啲。相反吳敏霞嘅個人描述就一句都冇；唔通眼見晶晶係霍家未來新抱仔，鞋油都會用多啲？
新聞稿如同廣告稿
劉翔上個禮拜五110米欄奪金，同樣獲東亞運公司贈送肉麻新聞稿贈興，稿中形容劉翔「如常拔起強而有力的左腿過欄架」、「像一頭獵豹繼續狂奔」、贏咗後綻放笑容，「四周環抱的高樓大廈如熊抱這位中國體壇巨星」，睇落似運動用品廣告稿多啲。
雖然香港足球隊爆冷贏日本隊奪金全城振奮，可惜踢咗場好波嘅港足都未得到同晶晶同劉翔類似嘅厚禮，相信唔少香港人都戥港足唔抵，大嘆東亞運公司使唔使咁大細超？東亞運公司係咪都要檢討，為咗避免涉及利益衝突而唔好將晶晶讚到天上有地下無咁呢？
mailto:[email protected]