環境局副局長潘潔平時身光頸靚一身貴婦look，似乎都係十指不沾陽春水一族，噚日佢出席民建聯嘅低碳餐烹飪活動獻技，唔少人唔多睇好，以為佢一定雞手鴨腳，點知拎起廚具嘅潘潔有板有眼，眨吓眼已經整出撚手好菜西芹炒大蝦，試過嘅人都大讚頂呱呱，估唔到佢廣東話唔鹹唔淡，煮嘅餸菜鹹淡味恰到好處。
潘潔自爆平時都想露兩手，可惜太晏放工，好耐未下廚，但忙極都要盡量抽時間整番餐畀老公食，唔知呢樣係唔係佢嘅御夫術？同場落廚嘅仲有民建聯主席譚耀宗同秘書長彭長緯，原來兩位男士都係住家男人，連點樣打到啲魚肉起膠同令桂花魚入味都難唔到佢哋，現場唔少人跌眼鏡。