上個禮拜，敏妮追住睇嘅新聞，除咗東亞運動會一幕幕港隊報捷新聞，仲有係高錕教授領諾貝爾獎嘅新聞。一篇高錕太太黃美芸嘅訪問，講到由於美國醫療保險，唔包括嗰啲尚未獲食品及藥物管理局通過嘅藥物開支，所以會利用諾貝爾獎金，等高教授接受到老人癡呆症新藥治療。
朋友問敏妮：「乜保險唔保老人癡呆症o架咩？」咁又唔係，敏妮睇過一啲危疾保險，受保嘅危疾包括「阿滋海默氏症（Alzheimer'sDisease）」，而阿滋海默氏症係最普遍嘅癡呆症。不過敏妮問過啲保險業嘅朋友，佢哋估計高教授買嘅係醫療保險。因為即使喺香港，雖然醫療保險係實報實銷嘅保險，即係接受咗乜嘢治療，保險公司會按保單提供賠償。不過，對於嗰啲未經核准嘅新醫療方法或者藥物，保險公司就唔會包括在內。相信高錕教授由於係接受未經美國食品及藥物管理局批准嘅新藥，所以保險先至唔包。
部份危疾有年齡限制
危疾保險同醫療保險定義唔同，危疾並唔係實報實銷嘅保險，同買壽險情況一樣，係一個定額嘅賠償。講得白一啲，即係中jackpot，如果投保人不幸患咗受保危疾名單裏面嘅病，就會獲得一筆過嘅現金。原意係患上危疾嘅人，一旦患病就可能唔可以工作，或者需要一筆錢解決燃眉之急，所以保險公司就提供一筆過現金，患病者除咗用筆錢解決燃眉之急，亦大可以攞筆錢去試新療法。
不過要留意，保險公司部份危疾保障有年齡限制，有啲保障至65歲，「老人癡呆症」係上咗年紀嘅人患病機會高啲。好似高教授咁，佢發現患呢個病時，可能已經過咗受保期，都係攞唔到錢。
溫敏妮