傳統名校華仁書院噚晚搞咗個感恩晚宴，慶祝港華90周年同九華85周年，噚晚舊生聚首一堂，雖然主持東亞運閉幕禮嘅特首曾蔭權冇到，但晚會都唔失色，李柱銘同梁家傑齊齊到場，佢兩個都係九華仔，Martin李話九華專出反對派，港華就專做官咁話。
港華多做官
港華校長譚兆炳好遺憾特首撞期嚟唔到，但唔少舊生畀足面一早就到，好似張炳良、曾浩輝同胡定旭。李柱銘開完民主黨大會就急急趕嚟。Martin唔肯再講公投，只係話佢同梁家傑同涂謹申都係九華仔，證明九華專出反對派，港華就專做官，除咗煲呔仲有孫明揚同林瑞麟。
晚會仲有拍賣籌款捐助母校未來發展，梁家傑話佢想投九華一張有55年歷史嘅考試專用枱，但佢好似冇舉過手落價，俾另一舊生以18萬投咗；患有俗稱象腿嘅先天性淋巴腺水腫嘅學生張仲斌，噚晚亦有到場，多謝各位舊生義不容辭，24小時內籌咗25萬畀佢舊年去台灣做手術，佢話手術前諗住之後一定要好番，回饋華仁。