周末外圍消息為今天大市打好底，預測美國第4季GDP狂彈4%，可能係4年來最好，睇埋內地上月出口跌幅明顯收窄，雖則係低基數效應作怪，但足以炒番起個市。大市已有3日時間沉睡於50日線之下，再唔升，真係狼來了。
呢一輪震倉，餓狼的貪婪更見明顯，即市單日轉向、高開低收、收市後將期指舞高弄低製造翌日大高/低水錯覺，好友撈底變「淆底」，購買力逐漸衰竭，資金轉戰個別超跌股仔。冠捷科技（903）11月底公佈第三季度業績，毛利下跌1.3個百分點至5.3%，股價未等到業績已慘被洗白白，加上傳出同奇美電子策略關係有變，股價在十多個交易日內，由6蚊邊震到落4.19元，跌幅逾四成之多，近日洗乾洗淨再上路。
夥英業達互補不足
業績差強人意，股價過敏跌幅遠超業績倒退幅度，即使有深圳上市嘅長城電腦做新大股東，市場對LCD顯示屏前景不樂觀。不過，作為全球最大生產商，實力毋庸置疑，問題係點樣喺咁低毛利之下殺出一片新「藍海」。其實撥開雲霧見青天，冠捷新發展概念有睇頭，首先係同LG合作搞LCD電視，明年第二季投產，從此可食到內需概念。
其次，更令人期待係同英業達旗下嘅英源達落實合作，生產All-in-One全功能個人電腦，初步投資6.4億元新台幣，冠捷佔49%股權。呢單消息市場都有反應，股價初現突破，扭轉笨豬跳走勢。英業達呢間台資公司來頭不小，係全球最大伺服器製造商以及第四大筆記簿型電腦代工廠，去年營業額超過107億美元，逆市下仍增長33%，上月收入按月升11%。
泊到個好碼頭，定單將水漲船高。因為英業達所接的定單甚多，單係筆記簿型電腦年產能3000萬台、企業伺服器300萬台，仲有Smatrphone手機500萬台，惟獨係未有做桌面電腦，夥拍冠捷正好互補不足。要留意係，該合營持股比例係51:49，可見冠捷應唔係純粹接Order整電腦咁簡單，兩者未來可能有更多合作機會。近期連中芯國際（981）都有得彈，冠捷唔應該跌成咁。
胡孟青