飲酒文化在內地，傳統上都係白酒行先，逢係宴會或一班朋友飯敍，內地人真係唔飲白酒唔安樂。
不過，內地人身家漸變豐厚後，品味開始有點轉變，好似現時唔少人開始接受飲咖啡而少喝茶，傳統白酒雖然一樣多人飲，但品嚐紅酒、甜葡萄酒者越來越多，所以半新股通天酒業（389）亦睇準時勢，計劃明年擴充產能1倍至4萬噸，以及在未來4年內完成興建酒莊及酒窖，務求在市場上佔有領導地位。
去年中國已成為全球葡萄酒第五大消費國。通天酒業旗下產品有70%係甜酒，另外30%係干紅，集團08年甜葡萄酒產量全國第一，在全國19個省共有71家分銷商；另計劃在全國開設20家專賣店，建立品牌形象以擴闊產品銷售。
通天酒業11月以1.25元招股上市，股價最高曾升見1.81元，近期股海氣氛轉淡，通天酒業亦隨市況回落，近日股價在1.70元至1.55元水平徘徊，上周五收1.59元，升2.58%，較招股價高出27%，仍有不俗獲利水位，加上10日線1.64元會有阻力，未買貨者唔使太心急。
方星俠