以「慢溜」13秒66贏取東亞運110米欄嘅劉翔，噚日終於發力，不過唔係狂奔跑道，而係衝刺中環名店。
劉翔噚日朝早11點50分左右，乘坐一架拉埋窗簾嘅七人車離開下榻酒店，以為神不知鬼不覺，但始終都俾記者識穿，車上仲有教練孫海平同一名女子。七人車去到中環舊中銀先係目的地，據講劉翔同孫海平等人喺樓上中國會食飯。
GA買鞋掃皮褸
食完飯下晝3點左右，劉翔等人施施然落樓，奪金後佢心情甚佳，面帶笑容，無對追訪記者黑面。血拼第一站係遮打道GiorgioArmani，劉翔主攻衫同鞋，據稱試咗鞋同皮褸，搞足差唔多一個鐘頭先離開。Shopping係幾消耗精力嘅活動，中途有人買咗三樽蒸餾水入去畀劉翔解渴，劉翔離開時，揸住一支飲剩一半嘅蒸餾水。
劉翔冇透露有乜「戰利品」，只係話出來「逛一逛，看一看。」八卦消息指「欄王」喺GA買咗皮褸、鞋同外套，埋單幾錢冇透露。行完GA，劉翔入咗Cartier約半小時，應該睇中啲嘢。佢上車離開時，隨行者拎住一個Dolce&Gabbana紙袋，收穫似乎唔錯。下一站係置地HarveyNichols，表示想買休閒服嘅劉翔，呢間店華衣美服似乎唔多啱佢口味，10分鐘後隨即轉戰對面馬路嘅ABathingApe。但係唔知係咪覺得呢間舖頭啲衫太潮，劉翔兜咗個圈就急急腳鬆人，寧願行過隔籬舖位間Joyce。
滿載而歸今離港
熱咗幾個鐘頭身，「欄王」睇嚟開始進入最高狀態，喺Joyce發力一拼到底，足足個半鐘頭先走人。男人買起嘢上嚟，有時真係唔講得笑，雖然已經6點半鐘天都黑晒，劉翔掃貨顯然意猶未盡，繼續衝刺由皇后大道中殺上安蘭街直奔D-Mop，呢間舖係型人買衫必到地方，估唔到「欄王」都來朝聖。
逗留D-Mop大半小時，半日血拼之旅衝線，之後劉翔一行人去文華東方晚飯，9點半左右返酒店，如行程不變，今日中午離港。
mailto:[email protected]