十二月十日中文大學頒授榮譽博士學位，三位榮譽博士之中，因有唐英年在，引來示威偷襲，三名人士自後台衝上禮台抗議，成為全港新聞，此段故事將來又會寫入中大校園示威史。唐英年在二○○二年得理工大學榮譽博士，○三年得城市大學榮譽博士，○八年得公開大學榮譽博士，當時社會上無人哼一句半句，學生不動如山，完全冇人嘈。何解到咗○九年中大頒榮譽博士學位畀佢，就有咁多聲音呢？想來係借題發揮，以表示對政改方案之不滿，推動政改方案係政務司司長嘅責任，○五年有許仕仁，今年就輪到唐英年唔好彩。
唐英年唔知道喺邊度學到功夫，據一位在現場嘅中大校董講畀左丁山聽（自己只係從電視畫面見到），唐英年在台上，如唐君毅銅像，屹立不動，眼向前望，任由三位示威人士在台上揮舞示威標語，等保安人員拉走示威人士。呢份「內功」幾深厚噃。到咗晚上，中大按慣例在恒生銀行博愛堂歡宴榮譽博士，新任校董會主席鄭海泉返娘家，在博愛堂迎接客人，唐英年與賓客談笑甚歡，與鄭大班唔知傾得幾埋。
遙想當年，鄭大班亦係激烈示威分子，係人都知佢曾與心光盲人院盲人在中環天星碼頭瞓街，被港英政府警察政治部跟蹤，列入監控名單。人係會向上嘅，鄭海泉畢業後，進入銀行界，努力工作，成為銀行大人物，家仲返回母校校園做校董會主席㖭，第一次主持畢業禮，就遇上搗亂性示威，不知佢有何感想。中大學生會一如事先宣揚，示威算是溫和，台上搗蛋之事，應與中大學生會無關。睇《蘋果》早一日嘅報導，與中大學生一齊策劃示威嘅，有退休校長周校友在。周校長已有資格做阿爺或者阿公，在新亞讀書時，與鄭大班係並肩示威嘅戰友，過從甚密。新亞喺十一月廿九日晚在會展舉行盛宴慶祝創院一甲子，鄭大班就周圍問人：「周校長坐邊圍？」可惜因為人太多，問咗一輪都不得要領。四十年前戰友，一個坐台上係大學主席，一個站在台下與大學生一同抗議，幾有趣，可惜冇人搵到佢兩位一齊影張相。