有人話《十月圍城》是被詛咒的電影，由10年前完成劇本開始，每次臨門開拍都撻Q，直到今年才能拍成。不過與其導人迷信，不如拆解真相，說穿了只是計數問題，條數當年計極唔掂，今日有內地票房支持，自然截然不同，加上粒粒巨星，難怪監製陳可辛都話：「要贏《建國大業》嘅4億票房唔係冇可能。」電影從來都是一門數學。 撰文：何永寧
細說從頭先講一段歷史，話說電影《十月圍城》由導演陳德森（Teddy）於10年前完成劇本，單是搭建一幢清末民初的香港中環街景，就要花費2,000多萬港元，連製作費成本約為5,000萬港元，有投資者經歷金融風暴燒炭自殺，之後又因沙士令計劃觸礁，拍攝一拖10年，卒之在陳可辛拉攏下，《十》片終在今年4月正式開拍，7月完成，排在聖誕檔期於內地及香港同步上映。
電影＝做生意
對於電影最終拍成，相信除導演陳德森外，感觸最大的非監製陳可辛莫屬，他日前接受本報記者專訪時說：「其實8年前已經同Teddy搞過個劇本，戲裏面個景唔搭又真係拍唔成，但當時個市場根本唔容許你拍一套咁貴成5,000萬港元嘅戲，所以最後都冇成事。到咗今年件事又唔同，因為大家都睇到個市場改變，可以容納一部過億嘅製作，促成《十月圍城》誕生。」
陳可辛05年執導的電影《如果．愛》，內地票房約3,000萬人民幣，到07年《投名狀》的2億人民幣票房，他察覺到內地電影市場正快速增長，得出的結論是可以用1億港元拍一套《十月圍城》，仍然有利可圖。陳可辛強調電影是一門很科學的計算，講到底即是生意一盤，他不諱言說：「電影從來都係一項商業活動，藝術永遠都只能夠喺呢種活動嘅夾縫中生存。如果唔係《甜蜜蜜》邊使搵黎明、張曼玉扮內地人吖，搵番內地人扮咪仲似，搵佢哋都係基於商業計算。你拍戲唔只要對自己負責，仲要對投資者負責，反而越藝術越文藝嘅電影就唔使，因為呢啲片嘅投資者好多都係為虛榮心。」
為了市場機關算盡，揸頸就命一直以來都是香港電影人的「使命」，就算香港電影的輝煌歲月也如是，陳可辛說：「香港電影一直以嚟都唔係拍畀香港人睇，你睇以前最賣座、拍得最多都係功夫片，因為嗰類片唔使睇字幕，文化差異少，乜嘢種族國籍都可以睇。今時今日咪一樣，啲外國人睇《臥虎藏龍》咪係睇啲人飛來飛去，有幾多人會睇周潤發同楊紫瓊段感情戲呀，我哋嗰時講笑話啲片係畀聯合國人睇嘅。有套戲係梁家輝同梁朝偉做嘅時裝片，為咗賣埠都要改個武俠片名叫《風塵三俠》，無非係想呃啲人買。拍戲要嘩眾取寵，好耐之前已經係咁，歸根究柢，因為香港市場嘅人口唔夠養活電影呢個行業，主要收入都係要靠賣埠，家香港嘅埠咪就係內地，所以你唔好話家啲人拍埋啲片畀內地人睇，當年咪一樣。」
票房＝分餅仔
陳可辛透露今時今日內地市場正在高速增長，單是一個聖誕節檔期到農曆年前的個多月，票房總計可達10幾億人民幣，這個餅還在每年增大，他說：「每年聖誕節前內地嘅片商就好緊張，因為又到分餅仔嘅時候。有時你套片幾好都好，票房好壞最後都取決於兩樣嘢：檔期同有乜對手。今年主要對手有《風雲II》、《刺陵》同張藝謀嘅《三槍拍案驚奇》，但好好彩3部對手都排喺月頭上映，佢有佢哋自己爭，我哋到月中18號至上畫。」別少看這個日子，這日正是定勝負決生死的大日子，陳可辛自豪地說：「通常有保證嘅片先攞到呢個期，因為仲有一個星期到聖誕，可以畀你慢慢煲起套片。早一兩年都會有兩、三部片，唔知點解今年大家都冇信心，冇人敢要，得我哋死守。」
當3個對手打殘打剩，才到《十月圍城》上場，所以陳可辛相信在《十》片上映後頭兩星期，有望達到3億人民幣票房，要更上一層樓就要看之後的對手，今年有幸撞正占士金馬倫（JamesCameron）出關之作《阿凡達》（Avatar），看似強弱懸殊，其實暗藏玄機，陳可辛說：「就係好多片因為避佢所以將映期推前，變相令到好多購買力留咗喺明年1月，大概係6億人民幣。只要《阿凡達》有乜閃失，要喺6億度攞億幾唔係難事，所以唔係冇機會破《建國大業》4.2億人民幣嘅紀錄。」雖然言之尚早，不過紀錄從來都是用來給人破，不是畀人看的。
故事簡介：護孫部隊血戰清廷
1905年香港，消息傳來孫中山決定冒險赴港與革命義士見面，密謀推翻滿清，清廷派出以胡軍為首的暗殺隊伍來港行刺他。為保衞孫中山的安全，富商李玉堂發掘出五位高手，組成護衞隊來保護孫中山。這些寂寂無聞的平凡百姓，在良知與正義的呼喚下，放棄了家庭、愛情甚至生命。一場又一場的血戰與惡鬥，在老香港的街頭巷尾展開。他們的犧牲，換來6年後辛亥革命的爆發。
話你知：粒粒巨星個個烈士
由黎明、甄子丹、范冰冰、胡軍、謝霆鋒、任達華和梁家輝主演的《十月圍城》除了巨星雲集外，死得人多也是特色之一。唔理你幾咁巨星，在片中的結果都是要死。
導演陳德森患上驚恐症
從來好事都是多磨，那怕你是約訪問或拍電影；你講陳德森的《十月圍城》一搞10年，我夠話占士金馬倫的《阿凡達》何嘗不是花了14年光景，理你人生有幾多個十年，能夠完成就是好事。
陳德森話每個導演的書櫃裏都有不少超過10年的故事，他說：「我近年拍完嘅《童夢奇緣》、爾冬陞嘅《新宿事件》每部都多過10年。《十月圍城》可能波折多印象比較深，其實有好多搞咗好多年都未拍嘅古仔仲未見天日，但係最緊要呢啲故事我攞出嚟仲係覺得暖就得嘞。」
遭逾百流氓包圍
陳德森續說：「但凡牽涉大製作問題一定多，呢部片用1億人民幣涉及嘅人同事咁多，產生問題亦都好自然。」不過《十》片遇到的問題算大不大，但計落也不少，先是因搭建場景遲了一個月完成，令進度相應推遲，在擔心不能如期完成下，令陳德森患了驚恐症，搞不好就會變成抑鬱症，沒辦法之下只能回港就醫，導演的工作只能由劉偉強幫手。拍攝期間又因為搭景超支，被片廠追加建築費，更找來百多名流氓包圍他們，壯觀場面不下於電影，最後當然付錢了事。
曲折離奇不但發生在故事外，故事內也死得人多。10多位巨星死足8位，除咗一出場即死的張學友之外，巴特爾、任達華、李宇春、黎明、胡軍同謝霆鋒通通要死，最難得是近年打遍天下無敵手的甄子丹亦不能倖免，陳德森笑說：「革命唔係淨係有識之士講嘅，市井之徒亦都捨身重義。」