煲呔噚日主持工展會開幕禮，之後一如以往同太太買吓嘢，不過佢哋只係行咗兩個攤位，加埋唔夠15分鐘，用咗2,000蚊都唔夠，同舊年用萬幾蚊掃貨相比，真係大縮水。煲呔否認今年孤寒，講笑咁話今年唔使刺激經濟，好在入場市民冇學佢，否則參展商隨時血本無歸。
煲呔夫婦噚日先去到一個零食檔，左睇睇右睇睇，買咗幾大袋年糕、米通、鹽焗腰果等食品，盛惠500大元。佢哋之後再去到一個賣木砌模型攤檔，曾太好有興趣，買咗60套木砌模型，總共1,380元，遲啲會送畀小朋友做聖誕禮物。兩夫婦夾埋使咗1,880元，同上年豪花過萬元比較，少咗個零。