繼曾鈺成後，涂謹申喜逢第二春，噚日同八方前行家蘇麗芬拉埋天窗，喺深灣遊艇俱樂部舉行婚禮。除民主黨兄弟外，大批高官、政界人士都畀面到賀。
新郎哥話自從同阿Sue一齊後，性格變得開朗同有活力，發表愛的宣言，以後大小事務、財政大權一概由老婆大人話事。新任涂太喺台上自爆，一度擔心父親唔接受阿涂，因為外父重視鄉情，嫁女好想返福建鄉下擺酒宴請鄉紳父老，阿涂卻係「無證」人士不能北上，好彩外父對此唔介意，阿涂先抱得美人歸。
為償新外父心願，民主黨何俊仁同楊森即場要求到場觀禮嘅煲呔幫手向中央求情發證，不過煲呔卻冇乜反應。一對新人親友眾多，要排長龍影相，毓民上台合照時突然大喊「五區總辭」，張文光同李永達立刻叫佢「落台」；長毛都玩嘢，送上《JoyOfSex》畀阿涂，祝佢好好享受新婚生活。新人會去澳洲度蜜月。