錯就要認，打就企定！在《亞洲星光大道》總決賽成為終極冠軍的羅力威，被質疑比賽中走音又甩歌詞，他直認狀態不好時會表現失準，又強調會自我檢討，以此為鑑，盡量避免案件重演。樂壇生力軍羅力威明年會出碟和舉行演唱會，為了以最佳狀態回饋歌迷，他承諾會加倍努力下苦功。 撰文：比華利
人如其名，新鮮出爐的亞視《亞洲星光大道》冠軍羅力威憑着實力在台上振聲威，他在總決賽夜又走音又甩嘴，遭網民質疑冠軍資格，但仍以0.1分之微力壓勁敵亢帥克，羅力威說：「阿克讓我啫。」綜觀當晚表現，羅力威險勝在於一份堅定的自信心。
等奇蹟入紅館
有過走音前科，羅力威深恐自己不擅詞令，變成講多錯多，盡量避談走音雙姝鄧麗欣和傅穎，他說：「人哋走音我唔知，我只係知自己成日都會走音同唔記得歌詞，中間好多因素，最重要係受精神狀況影響，所以事前一定要做足準備，如果演出期間真係不幸走咗音，我之後一定會好好檢討，更加唔會放棄，要重新諗辦法杜絕再次走音，之後會加倍努力換番觀眾對我嘅支持。」
羅力威相信失敗乃成功之母，一個肯承認自己錯失的歌手，願意將勤補拙，樂迷的耳朵有福了。
羅力威對自己的聲線非常了解，他說：「我把聲太柔，我覺得適合唱浪漫情歌，試過有接線生誤會我係羅小姐，好好笑。」
聲柔體瘦，卻不損羅力威的志氣，雖然亞視有意於明年為他出唱片和搞演唱會，誓要捧紅他，但他給自己訂下的目標更遠大，誓要踩入紅館，他說：「紅館開騷係每個歌手嘅夢想，我自己都好恨有呢一日，起碼都想開十場八場，不過要開演唱會之前，最好先擁有自己嘅專輯，我好想喺一、兩年間達成呢個理想，做得成係奇蹟。」
口密拒談感情
一個成功的藝人，除演藝資質，天時地利人和都要配合，羅力威擁有當歌手的先決條件，也是唱片公司搶手貨，偏偏生不逢時，近年唱片業低迷，當紅歌手的唱片也會滯銷。
對此樂壇困局，羅力威說：「我一直對音樂有好大嘅熱誠，從來冇諗過要用音樂去賺錢，我唔會理其他環境因素，我呢一刻只係用心去做好每首歌，只要有小部份人支持，已經足夠畀我動力。」
成為樂壇新丁的羅力威，躍躍欲試希望盡快投入演藝工作，更視劉德華為學習對象。不過形象正面的華仔今年被踢爆瞞婚，一度傷透fans心，羅力威在總決賽時，跟性向成疑的台灣歌手楊宗緯對唱《背叛》時，二人間的互動也爆出激烈火花。
問到羅力威的感情生活時，訪問全程一直健談的他，瞬間似被武林高手點了穴，不停用手指掩嘴，冷場3分鐘後，他最終投降：「可以唔答呢個問題嗎？」後來在身邊的亞視公關教路下，他改答：「家先專注喺音樂上，拍拖嘅嘢其實遲早（記者）實知，我有開心嘅事都願意同大家分享。」其實羅力威越口密，越容易成為追訪焦點。
感謝家人支持
這次在《亞洲星光大道》奪冠，羅力威謂最感謝家人默默支持，他說：「我自問係一個任性同反叛嘅細路，好多時都決定晒自己嘅路先同屋企人講，不過只要冇行差踏錯，家人會畀好大空間我去闖。」一夜成名有否飄飄然？他說：「我唔覺得自己有乜嘢轉變，識我嘅人就會知道，依然係嗰個我。」
服裝：TedBaker
場地：TheTartanBar（港威酒店）
笑闖江湖
羅力威昨日與江若琳在銅鑼灣出席playstation活動，二人打扮成遊戲人物示人，大玩cosplay。羅力威被指在《亞洲星光大道》賽後首度接受傳媒訪問時，遲到、黑面兼態度差，但他昨日心情愉快，又笑咪咪幫江若琳戴頸鏈。
羅力威表示有看過指他態度差的報道，他說：「嗰日我覺得OK，平時我係唔多笑，我都知道自己唔夠笑容，我要學笑，都好，畀大家知我以前係咁，總之我會學習多啲笑，希望大家畀多啲機會我。」
採訪：楊潔雯
攝影：黃偉雄
