內地靚仔黃曉明前晚去咗台灣，逗留三日兩夜，為嘅係拍新歌兼幫上海世博會主題曲拍MV。佢前晚喺酒店安頓好後，吔咗條蕉，就趕去一間夜店會合台灣敗犬女王楊謹華開工。MV劇情係話佢兩個眉來眼去，但襄王有心，神女無夢，靚仔搭訕，女王請食檸檬。
現場見楊謹華着住件黑色套裝，反而旁邊班臨記小妹妹個個都好性感，楊謹華經理人即刻好識做，趁空檔走去問導演：「要大辣、中辣，還是小辣？」然後佢就帶住楊謹華去換衫。過咗一陣，楊謹華着住件紅色低胸裙出現，32C美胸呼之欲出，但佢好擔心走光，不停整理，加上身旁經理人、女助手出手相助，1對奶上有6對手喺度游走，都幾搞笑，卒之佢哋拍到凌晨3點先收工呀。
一指神功打字
瞓咗兩粒幾鐘，黃曉明又喺清晨5點出發去拍上海世博會MV，行勻淡水碼頭、北投捷運、圓山飯店、中山北路舞蝶館、永康街等知名景點，應該攰到冇命咁滯。其中最好笑係導演喺圓山飯店12樓嘅走廊上，要黃曉明好寫意咁打電腦飲咖啡，點知佢突然尷尷尬尬，動作遲緩，佢好難為情咁話：「我是電腦白癡，只會用一指神功打電腦。」
搞掂收工後，黃曉明今日一早離開台灣去橫店拍戲，佢話好感謝楊謹華百忙之中抽空助陣，而楊謹華噚日一早都飛咗去新加坡為MarcbyMarcJacobs新店剪綵，佢大讚黃曉明敬業：「他聰明、努力又專業，希望有機會可以在戲劇或電影上合作。」