曾幾何時，「鄭臭四」是一個禁忌，不能在鄭秀文（Sammi）面前提起，沒想到這三個字，今天竟然出自她口中，Sammi說：「唔係話我信咗神就立刻可以由『鄭臭四』變做『鄭四萬』，咁樣太神化。」外間總是將Sammi的改變神化了，其實年事漸長，也是令她蛻變成鄭四萬的原因之一。 撰文：胡比
對於「臭四」這個稱號，Sammi心知肚明，但從沒在意，她坦言：「當時嘅我自信又自大，心諗改個咁嘅名咪改囉，一個名對我嚟講並唔重要。」問她當時脾氣是否很差，經常對身邊工作人員發脾氣？她說：「唔好話發脾氣，應該係用『放任』嚟形容，我相信同我做嘢嘅人一定會感受到。我係唔會亂咁鬧人，只可以話，我以為愛我嘅人都可以包容到我，所以我會將最真嘅一面表露出嚟，有時會用錯咗方法，我高估咗呢種愛，原來會令人感到痛苦，係唔可以咁放任。」
感恩：弟弟無限包容
Sammi指了解她性情的人，就會懂得如何與她相處，就如她的親弟，多年來為她處理工作上的問題，在她最忙的幾年間，無論發生任何事，她的弟弟都會包容她，從沒怨言，深明她承受沉重的壓力，一直在她身邊扶持幫助她。回想過去，Sammi感動地說：「呢種包容真係好唔話得，有時同細佬傾偈講番，佢只會講：『得啦，明白o架喇。』真係好感激。」
性情上的改變，Sammi強調並非全憑信仰，因為這種說法未免太神化，她說：「人大咗性情就會改變，家我嘅生活好穩定，好多嘢都settle晒，可以選擇想要嘅生活，容許我有所改變，唔係話我信咗神就立刻可以由『鄭臭四』變做『鄭四萬』，咁樣太神化，唔係咁表面同膚淺囉。」
迷失：身心備受困擾
人生方向突然起了變化，當中Sammi經歷過甚麼，令她有所頓悟？有傳早年拍罷電影《長恨歌》後，因劣評如潮，令她情緒備受困擾而患上抑鬱症，久久未能釋懷投入工作，Sammi坦率承認確曾患過抑鬱症，但從未看過心理醫生，她憶述：「其實拍《長恨歌》之前，我已經覺得自己怪怪哋，無論身體同心靈上都好怪好迷失，有人講過抑鬱症係因為身體嘅血清素產生咗變化，食藥可以控制，但當時唔覺得睇醫生可以幫到我，食幾多藥都冇用，因為好似有好多問題解決唔到，生命同心靈上都有好多困擾纏擾住我。」
何事纏擾住這位樂壇天后，令她未能解開心中鬱結？Sammi娓娓道來：「當時對生命嘅睇法係錯嘅，成日都諗住自己要做個優秀卓越嘅人，要點樣做先可以對世界同屋企人有所貢獻，乜嘢都要追求完美，追求唔到就會令我極度痛苦，感覺好慘烈，直情有啲走火入魔，乜嘢都要做到最好。好以我要瘦咁，我想瘦到得番21吋腰，根本就冇可能，一啲都唔健康，完美本來就好難界定，好介意人哋眼中點樣睇自己，就連結果都要自己掌握，但係其實每樣嘢都唔可以預計。」
其實Sammi早在十多歲時，已在胞姊帶領下信主，她笑言：「不過嗰時嘅信念好吔吔烏，唔覺得要認真對待自己嘅信仰，到有事嘅時候，喺神嘅安排下，我又重新認真對待自己嘅宗教，令我對生命有咗唔同嘅睇法，開始將所有嘅結果交畀我呢位大佬去安排，家只會着重我有冇盡力去做好自己嘅嘢，結果就交畀神，就算結果係唔好，我都會接受，因為我已經盡咗力，唔好嘅結果都係一種體驗，最緊要係好好享受自己嘅人生。」
釋疑：信徒可以好潮
之前有報道指Sammi信教後計劃將演唱會變成傳道晚會，不再有性感勁歌熱舞表演，Sammi很想糾正大家對信徒的誤解，她說：「其實信徒都可以好潮o架，主冇話唔畀人食煙飲酒，冇話唔可以化妝買樓，唔係大家想像中咁老套，只要有信念同埋諗嘢正面，做到一個好榜樣就得。好似食煙咁，主冇話唔畀食o架，只不過最好唔好做之嘛，我戒煙係因為身體問題，紅酒我都會飲，但唔會過份囉，信教依然可以繼續享受生活，冇人知一世人會活到幾多歲，可能我85歲嘅時候，想食番煙都唔出奇o架。」
Sammi強調只要與其宗教信仰沒牴觸，她的工作完全不會受影響，她還笑言：「都唔會有人搵我拍三級片o架啦。」她又澄清之前有報道指她曾捐出數千萬給教會，她慎重地說：「真係冇呢件事，希望大家唔好亂寫，我係有捐錢畀教會，但只係一份心意，唔係報道講嘅咁多錢，我唔想用呢啲嚟造新聞，唔可以亂咁落呢啲credit，因為關係到教會同神。」
愛情篇：姊弟戀8年為限
自從與許志安的故事完結後，近年過着單身生活的鄭秀文，最近還一嘗獨居滋味，問到其愛情觀有否隨之改變？Sammi說：「以前我覺得一拍拖就要結婚，唔結婚拍拖嚟做乜？家唔會諗結婚，有拖拍咪拍囉，睇吓神點安排，以前對愛情太過嚴肅，家唔會理年紀，係咪要門當戶對，太老套喇。」
「有都唔話你聽」
鄭秀文言下之意，姊弟戀也不抗拒？她笑說：「唔介意，但最多只可以接受細我7至8年。」可曾遇到過？Sammi蠱惑地笑：「哈！有都唔話你聽喇，容乜易俾人亂寫o架！」
其實靚女又點會冇人追？Sammi不諱言有追求者，不過約會數次後，感覺不對便轉化成朋友，她說：「人越大就越難搵對象，因為已經有固定嘅性格同特定嘅喜好，自己又有能力照顧自己，要搵個夾嘅並唔容易，一切隨緣啦。」
攝影：張文華、CKofSecret9ProductionHouse
化妝：RickyLauofZingTheMakeupSchool
髮型：BillyChoiofHairCulture
Styling：tanglai