亞視股權又起風雲日日有新聞，近日仲被騙徒睇中。高層葉家寶噚日話，早幾日發現有個內地老翻亞視網站，名叫亞洲TV，訛稱即將舉辦「2010年亞姐國際小姐競選大賽」，正公開搵協辦機構；呢個冒牌網站更將《亞洲星光大道》Logo改成A貨選美大賽logo，幾可亂真，葉家寶呼籲大家咪落叠，更提醒女士千祈唔好中計參選，萬一係色情陷阱咁就弊。
八方上網睇過呢個山寨版「亞洲TV」網站，以橙色為主調，似模似樣，可惜露出馬腳，竟然自稱戰略聯盟包括TVB，亞視同無綫長期打對台，有乜可能結盟？葉家寶話，相信呢個網站以內地人為行騙對象，已搵律師跟進。