臨近聖誕節，呢輪啲薄屏iDTV鬥得好激烈，一線品牌就鬥出LED背光技術嘅全高清LCDiDTV，二線品牌鬥平及鬥多功能。好似新朗（Cinetron）啱啱推出咗全新嘅AX300series同UXseries兩個系列嘅全高清iDTV，賣點就係將iDTV變身成為一個多媒體播放中心。
支援全高清影像檔案
新朗本港代理第一電業助理總經理Byron話，AX300series同UXseries機殼有啲唔同，AX300以隱藏式喇叭設計，外形靚仔啲，功能就一樣，屏幕尺寸由19吋至37吋。兩款機除內置咗數碼廣播接收器同有錄影功能之外，最大賣點內置多媒體播放器。
Byron話，呢部唔係一部iDTV咁簡單，係一部多媒體播放中心，支援到家互聯網最流行嘅全高清影像檔案如MKV、MOV、AVI、RMVB等，圖像檔案JPG、BMP同音樂檔案MP3、WMA等，「上網將啲高清片下載到USB手指或外置硬碟機，插入去電視嘅USB端子，就可以睇到高清片。唔再局限只係睇電視節目。」
Byron即場試播由電腦下載嘅全高清片段，畫面都幾流暢噃，唔見有窒格。問吓價錢，22吋都係賣2,680蚊，咁又幾抵用，37吋都係賣4,780元（查詢：28217645）。