民主黨聽日舉行會員大會，除非有戲劇性變化，否則民主黨唔參與總辭公投幾成定局，神秘人早幾日刊登個「公投，投什麼一票？」時間啱啱好，可能有人認為應記一功。
左派廣告內容微妙變調
政圈繼續玩競猜誰是神秘人遊戲，之前有人思疑係大班鄭經翰做嘢，佢高分貝否認，同時又有人同八方講，呢個廣告可能出自民主「高」人。
據稱呢位「高」人有三高，第一係住得高，僅低於山頂天比高；第二係收入高，民主派內應該無人能及；第三係輩份高，好多人對佢言聽計從，因此呢個反公投廣告，出自佢意念、手筆絕不令人意外，事實上廣告內容到肉，連社民連中人都話幾有水平。
講開登廣告，左派繼續動員愛國愛港社團刊登挺政改諮詢文件廣告造勢，心水清人士發現，近日呢啲廣告內容微妙變調，早前係表態支持區議會方案，近日則只說支持政制發展。