資深政客名言，呢個世界由兩種票話事：一係鈔票，另一係選票。有鈔票可以買選票，有選票可以搵鈔票，兩者無分軒輊。代議士有票在手，可以左右議案，因此面對高官可以巴之閉，煲呔要通過政改方案，亦為向議員求票、乞票而頭痛，鬼叫冇票在手咩！不過風水輪流轉，今勻輪到煲呔大把票在手，議員要反過來向政府拉票㖭！
譚偉豪只撲到一張
東亞運香港足球隊創造傳奇一刻，今日下午對壘日本踢冠軍戰，無數球迷已號召「紅衫軍」今日進場以紅海淹大球場，力撐港腳。前晚入場捧港隊嘅煲呔，承諾今日再入場打氣，一旦港隊奪冠，都可以沾沾人氣、旺氣。八方聽聞多個議員都想親身見證傳奇一刻，可惜之前冇準備，臨急臨忙噚日先至四出撲飛。佢哋平日經常俾高官游說拉票，今次倒轉要問官員攞票，有幾狼狽可想而知。
建築界議員劉秀成係球迷，據講早就張羅好門票，所以冇講麻煩；資訊科技界議員譚偉豪噚日先出動，撲到一張飛咁大把，佢話港隊雖然係生力軍，但三日踢兩場，恐怕體力不繼，慶幸有主場之利，「如果攞到冠軍，立法會足球隊會請佢哋食飯勞軍。」工業界林大輝有兩張飛，「我同太太一齊入場，支持香港隊。」
民主黨張文光同鄭家富，據講出盡九牛二虎之力拉票，先可以搵到飛同家人一齊入場，張文光話雖然對手唔算太強，但港隊打入決賽，總算鼓舞本地體壇同為港增光，對球迷而言更可以話係早到嘅聖誕禮物，「如果攞到金牌，就真係太好嘞。」
所有門票噚晚售罄
另一個民主黨議員李華明冇咁醒，今次撲唔到飛入場，惟有喺屋企睇電視，唔能夠感受現場氣氛，佢阿Q精神自我安慰，「喺屋企舒舒服服睇波都幾好吖！」
如果大家今日想入場，已經冇機會，因為東亞運大會稱所有門票噚晚售罄。
mailto:[email protected]