建制派動員撐政改方案幾乎全民皆兵，連名媛都要幫拖，多數現身ball場，甚少涉足政治嘅包陪慶，近日都發功，邀請省級政協噚日出席座談會，聽中央政策組首席顧問佳叔講解政改方案諮詢文件。
包陪慶係已故船王包玉剛長女，係社交界名人，好少踩過政界，據講包陪慶係以港區省級政協委員聯誼會對外交流委員會主任身份搞呢個座談會，包陪慶係浙江省政協常委兼全國政協，落力推銷政改方案責之所在。
工聯會鄭耀棠牽頭嘅「政制向前走大聯盟」下星期正式成立，行會召集人梁振英自爆已歸隊，八方聽聞多個身在建制嘅民主派人士都埋咗堆，齊齊跟阿爺大隊走。