張永霖辭去亞視執行主席之職，對記者講佢身兼香港大學SPACE主席，以後花多啲時間喺教育方面喎！SPACE真係多謝佢嘞，不過張先生最好在SPACE教吓如何欣賞及賣買名畫，教工商管理就可以慳番喇啩。
張先生入主亞視，乃係受查家所託，與佢簽約嘅，係名力集團，換言之，張生支嘅薪水，來自查家，代查家睇住亞視，但據洩漏於外嘅辭職信透露，張生最近在亞視董事局內，要為各股東爭取公平。所謂食君之祿，擔君之憂，何解張生食查家之祿，擔蔡家之憂驚住有人不公平？真係奇哉怪也，如果佢多睇《三國演義》，少睇啲美國MBA教本，可能唔會有如此行為。在中國人社會，讀多多哈佛劍橋都冇用，第一本書要讀嘅，就係《三國》，有餘力就讀埋《資治通鑑》。
亞視呢盤生意，恰死富豪、精仔、叻仔，無論邊個做大老闆，始終畀無綫㩒住打到扁，令無綫輕輕鬆鬆咁壟斷免費電視市場，左丁山老早裝置有線電視，跟住裝埋now，現在對免費電視似有若無，久唔久先至睇吓，幾年來覺得毫無損失。邊一個MBA學生，商學教授可以寫篇論文講如何挽救亞視，將公司轉虧為盈，應該獲管理專業協會頒授「管理學大獎」。
查家為何入股亞視？蔡家為何入股亞視？呢兩個工業家族過往對傳媒完全唔熟，未做過呢行，點解咁勇猛投資落人人都話唔掂嘅亞視？香港有好多古怪之事，此乃其中之一，尤其是查懋聲係中環著名精仔㖭。
不過在香港投資媒體，有時並非一定需要有一個經濟理性嘅理由，回歸後更非罕見，我哋香港人大都笨笨哋，時刻要睇住自己荷包嘅，毋須諗得太多嘞。香港地怪事特多，譬如話救護車去救人，上斜路竟然無油，確係匪夷所思，我哋自己揸車，會唔會行行吓冇油行唔郁呀？死因裁判官陳碧橋十分幽默，建議消防處另找汽車店維修救護車，唔係一定要搵機電工程署，消防處會十分為難。但最諷刺幽默嘅就係，機電工程署三四年前攞過香港專業管理協會嘅「優質服務大獎」！