「肥」係女人嘅公敵，但有一日可能成為納稅人嘅公敵。因為前幾日，立法會議員提出咗擴闊稅基，不如開徵「肥胖稅」嘅建議。公司兩位小妹妹，噚日食住薯片同敏妮呻：「日後收『肥胖稅』，我實要畀，歧視肥人呀！」
最早提出「肥胖稅」嘅，應該係世衞組織，佢哋嘅出發點係正面嘅，原因有好多病都係由肥胖引起，為免加重醫療系統負荷，所以提出用徵稅嘅方法，遏止大家肥胖。不過由於涉及歧視，所以俾人反對。
至於家所謂嘅「肥胖稅」，都有唔同嘅版本。之前有廉價航空公司為咗節省成本，增加收入，提出向體重超磅嘅乘客徵收「肥胖稅」。
敏妮都試過坐飛機時，遇上旁邊嗰位係一位頗肥嘅男士，敏妮三分一座位俾佢佔據，肥胖男士都覺得唔好意思，但飛機又滿座，惟有焗坐。敏妮唔係歧視，但每個人都應為自己嘅事負責，既然你嘅身形係要佔兩個位，咁應該畀兩張機票錢，好似行李超磅要畀錢一樣。
向垃圾食品徵稅
另一個版本嘅「肥胖稅」，就係歐美一啲地區，向令人致肥嘅junkfood好似汽水、薯片咁徵稅，好似徵收香煙稅咁，而唔係兩位小妹妹以為，超磅幾多，按磅數計稅。對於呢個層面嘅「肥胖稅」敏妮就有啲保留，事關敏妮都好鍾意食薯片，飲汽水，尤其壓力大時，更加會用嚟減壓。
不過諗深一層，正如世衞嘅出發點，肥胖係唔少疾病嘅元凶，控制體重，食少啲junkfood，其實百利而無一害，對健康好啲，就可以慳番啲醫療費。敏妮聽過，外國有啲保險公司會徵收附加費，原因亦係「肥＝唔健康」。
不過，香港政府開徵新稅種要過五關斬六將，就算成功可以開徵，兩位為食小妹妹應該有足夠時間減肥！
溫敏妮