馬詩慧、歐陽妙芝和汪詩詩噚日帶埋佢哋啲仔女，出席喺灣仔舉行嘅聖誕曲奇籌款記者會，記者會上仲連同其他小朋友齊齊炮製聖誕曲奇，雖然整餅嘅過程有啲手忙腳亂，但係佢哋整得好開心同投入，仲整到連活動完結都唔願走！為人父母又係模特兒，講到o靚模周凱盈（Monique）日前承認藏毒，但上庭前仍然索K一事，曾經炮轟o靚模谷胸賣肉嘅馬詩慧，聽完後就話：「吓！乜家仲有o靚模咩？佢哋唔係收晒檔咩？如果真係有呢件事，係咪要去戒毒所，仲等下次？呢啲唔好再等喇！」
贊成校園驗毒
身為三個仔女媽媽嘅Janet，仲話好贊成校園驗毒計劃，佢話：「如果冇食過梗係唔怕去驗，但係我覺得應該連其他地區嘅學校都一齊參加，私隱嘅配套要配合得好好。」跟住又問到佢今個聖誕嘅節目，佢就話：「Michael（王敏德）要開工，加上啲小朋友又要考試，所以今年留番喺香港過聖誕。」
同樣因為老公甄子丹聖誕要喺上海開工，所以汪詩詩今年聖誕亦會留番喺香港，佢話：「上海家好凍，我擔心啲小朋友冷病，所以唔諗住去探班，遲啲佢會返嚟出席首映，或者提早慶祝。」馮仁昭仲見到佢囡囡戴咗副眼鏡，詩詩苦笑話：「可能遺傳，雖然囡囡第一次配眼鏡表現得好開心，不過女仔始終係貪靚，所以有時候會除低副眼鏡先影相。」