容祖兒與古巨基均是今年各頒獎禮的男女歌星獎大熱，祖兒今年更爭取六度成為最受歡迎女歌星得主，無綫總經理陳志雲公開年中與二人飯局的照片後，爭獎是非隨之而起。兩人強調吃飯與獎無關，祖兒更認為拍劇吃飯換獎之說無稽，但聞得謝安琪為無綫拍旅遊特輯得獎勝算高，她竟謂：「咁我機會低啲啦。」
古巨基、容祖兒、胡敏珊、周汶錡及鄭文雅等前晚在金鐘出席某雜誌活動，獲頒「FashionwithHeart」獎項。無綫總經理陳志雲曾在網誌上貼出與祖兒、基仔及二人經理人霍汶希飯敍的照片，在年底頒獎禮臨近時刻，不免惹起拉關係爭獎的傳聞，前晚基仔就此回應，他說：「個飯局係年中食o架，公司安排嘅，完全唔涉及工作同頒獎禮。」
基仔硬銷金曲
問基仔對今年的最受歡迎男歌星獎是否有信心，他謂：「隨緣啦，今年我好滿意自己嘅音樂成績，做電視又好入屋。」談到他去年首次得該獎時感謝緋聞助手女友Lorraine，今年若再得獎，是否宣佈結婚？基仔謂：「我有排都未結，攞唔攞到真係隨緣，大家唔好咁敏感啦。」問到其歌曲可有機會得金曲金獎？基仔即硬銷地說：「我啲歌都幾好聽o架，我鍾意《地球很危險》。」
祖兒也謂與陳志雲的飯局純粹交朋友，她說：「值得交嘅朋友就要畀啲時間同機會，陳生除咗係高層，私底下係好nice嘅人，同佢傾偈袋到好多嘢落袋。」她謂以往會避忌，但現在人長大，覺得想做就去做，故不會為輿論妨礙她結交朋友。
祖兒今年爭取六度成為最受歡迎女歌星，她表示多年前被指拍劇換獎並非屬實，不過當提到謝安琪為無綫拍旅遊特輯勝算更高時，祖兒竟謂：「咁我機會低啲啦，我都好畀心機做嘢，希望大家睇得到。」
祖兒自認中女
日前新城電台公佈一項調查，指G.E.M.是學生最欣賞的女歌手，力壓第二的蔡卓妍及第三的祖兒，祖兒說：「G.E.M，係10歲至20歲青少年嘅偶像，我介乎中女年紀，得到大家認同係值得高興，無論攞一二三都咁開心。」
此外，胡敏珊性感現身，談到黃伊汶進軍鐘錶界，她說：「多啲競爭先多啲進步，我都識佢媽媽，會恭喜佢。」她謂聖誕已安排好節目，但未必與緋聞男友龐維仁同度。
採訪、攝影：何慧斯
