亞視股東不和，執行主席張永霖辭職，理由不詳。只不過係短短一年啫，去年十二月四日，張永霖與王維基主持記者會，意氣風發，張主席當日誇下海口，兩至三年內令亞視轉虧為盈，五年內上市，令全港電視觀眾震驚，又話佢與王維基背對背，無人可以分離佢地。言猶在耳，到咗○八年十二月十五日，張永霖就宣布王維基辭職，王維基自己都唔知道。
○九年一月二十九日，台灣富豪、旺旺主席蔡衍明以私人名義入股亞視成第二大股東，派左右手胡競英來港做亞視行政總裁，○九年十二月七日，上任啱啱滿一年嘅張永霖辭職，亞視虧損，流血依舊。
張永霖辭職生效之日，左丁山與活力先生等人在喜萬年吃「乳豬」，活力先生話：「搞足成年，收視率都係得兩點，應該辭職啦！」係唔係因為收視率咁簡單呀？市場盛傳查蔡兩家不和，蔡家想增持亞視，變成真正話事大股東，但查家唔制喎。
睇吓股東結構圖，查家果然係高手，大哥查懋聲做deals三十年，對如何控制一間公司，咪埋眼都識背，三弟查懋德在矽谷做慣直接投資，甚麼股東協議未見過，相反地，蔡衍明來自台灣，對股權結構呢回事，知得比較少咯。試睇吓，亞視股權之中，陳永棋及劉長樂嘅公司佔26.86%，僑光集團（中信集團）佔14.8%，汎泰集團（查氏兄弟）佔10.75%，大股東AthennaInvestmentLimited佔47.58%，而蔡家佔呢間A公司投票權49%，查氏佔51%，換句話說，即使僑光、劉長樂、陳永棋賣晒畀蔡家，蔡家共佔41.67%加埋47.58%嘅49%（等於23.3%），總共約65%，仲唔係最大股東？但事實上就唔係，查家佔Athenna51%，緊握話事權，蔡家點都冇符。呢條控制公司嘅橋，並非新鮮，朋友之中，外滙L年青之時想話起飛腳，老闆Y乃老薑，立即設立一間新公司做外滙生意，外滙L佔40%，一間BVI公司佔60%，而老闆佔BVI公司55%，外滙L佔40%以為好掂，點知做咗三年賺大錢之後，老闆係唔肯派息，又唔肯派花紅，攪到外滙L扎扎跳，又唔捨得走，卒之捱多一年，辭職而去！Athena在日本漫畫「聖鬥士」之中，名叫雅典娜，希臘神話之中，乃宙斯之女，代表智慧、戰爭、藝術、正義，睇嚟喺呢間公司之中，查氏有智慧，蔡氏只係有戰爭勇氣啫。