現今樂壇青黃不接，新晉歌手懶音、走音乜都齊，所以實力派歌手開騷特別具吸引力。曾航生（Sam）和李國祥（KC）兩位低調歌手在演唱會監製梁安琪鼓勵下出山，明天（12日）起舉行兩場「雙子星演唱會」，回饋歌迷多年來的支持。
久未於報章雜誌露面的曾航生與李國祥合作舉行「雙子星演唱會」，兩人的首本金曲《再見亦是朋友》和《餘情未了》等，肯定令樂迷聽出耳油。曾航生早前與演唱會監製、女友梁安琪一同接受訪問，問到為何有與KC合作的構思時說：「其實我自己好低調，但係見我哋嘅前輩都有咁多人欣賞，所以就出嚟做吓囉。」
安琪挑戰何婉盈
梁安琪續說：「佢真係好低調，我睇唔過眼，一個咁好嘅歌手應該出番嚟囉。」她又說：「其實我係神秘嘉賓，家好辛苦練緊《再見亦是朋友》，壓力都幾大，但係要唔差過何婉盈唔難。」阿Sam則指壓力頗大，他說：「梗係大壓力啦，平時唱歌同上台做騷係兩回事，做騷要有要求，又要同liveband夾，但係當玩吓啦，做兩場睇吓係點情況囉。」
李國祥慢工出碟
與曾航生相比，KC就輕鬆得多，他說：「最驚係啲衫唔靚，其實歌就揀好o架喇，係未正式排囉，不過大家都咁有經驗，個表演應該輕輕鬆鬆，有乜嘢問題一坐低傾兩句就解決晒啦。」正準備投入男裝內衣生意的他又說：「家都係教吓學生，新碟一直有做緊，但係我同監製都係要求好高嘅人，大家都一早聲明唔好就寧願唔出住。」
採訪、攝影：藍文浩
場地：樂韻琴行