今個星期三，包括《蘋果》在內共三份中文報紙，都有個「公投，投什麼一票？」嘅全版廣告，內容對民主派搞五區總辭，變相公投不以為然，邊個畀幾十萬元登呢個廣告十分神秘，因為下款只係署名「一群默默支持民主黨二十年的選民」，江湖傳聞指呢個反公投廣告由一班陸羽常客飲茶時發起，由政經界公關猛人拉線，噚日政圈忽然傳出小道消息，指大班鄭經翰都有份埋單。
由於大班又名「煲呔針」，如果佢出錢出力，禮賓府又扮演乜嘢角色呢？頓時令呢單嘢可供想像空間爆升，況且心戰室點會出一招就收工？因此好多人都期待好戲上演。不過噚日大班誓神劈願矢口否認，極度嚴肅咁澄清，雖然佢都係陸羽常客，今次卻百分之一百冇佢份，外間傳言關佢事，真係太畀面。
大班聲稱支持總辭公投，今日會有文章公開表態，所以完全冇理由畀錢賣廣告唱反調，左手打右手，唔通思覺失調咩？而且佢近日忙於搞新電台試播，稍有差池分分鐘牌照不保，仲邊有咁多時間精力喺外面搞搞震？就算要造勢，都等到開咪時先開聲，分毫不花，一舉兩得㖭。
雖然大班同陸羽幫劃清界線，但佢透露連民主黨都有人思疑佢有份，今次真係無端惹是非，只係呢次佢唔敢叨光嘞。呢個大班聲言冇份埋單，八方一再打聽，有人指唔通係另一個鄭大班？亦有人話煲呔身邊都有個銀行大班，不過佢數口精明，不做賠本生意，唔似會花錢匿名賣廣告喎。
有傳係社民連fans所為
消息傳來傳去，後來甚至有人講出一個連八方都覺得匪夷所思嘅陰謀論，就係指呢個廣告表面上反公投，質疑唔知公投在搞甚麼，實際上係逼民主黨靠邊站，所以背後好可能係社民連或公民黨fans所為，如此曲線為公投鳴鑼開道，套用網民潮語真係「曲到圓」，因此民主黨中人都話頭，真係睇唔出個廣告有咁「深」含義。
mailto:[email protected]