Angelababy首次擔正拍攝賀歲片《花田囍事2010》，與黃百鳴合演哎吔父女。農曆新年檔期有不同o靚模參與拍攝的電影上映，但黃百鳴向Baby大派定心丸，睇好她成為喜劇接班人！
黃百鳴今年起用電影《家有囍事2009》原班人馬包括古天樂、鄭中基、吳君如和李香琴等拍攝明年上映的古裝賀歲片《花田囍事2010》，今次加插o靚模寵兒Angelababy，還有同門師姐熊黛林演出。戲中黃百鳴和Angelababy飾演哎吔父女，潮人加後輩合力爆出火花，令黃百鳴大有信心電影在新年檔期跑出。
低溫跳河凍到震
Angelababy首次擔正，黃百鳴投以百分百信心，縱然Angelababy被彈演技差常NG，哎吔老竇黃百鳴一於撐到底，他日前說：「以新人計佢已經超水準，又拍住班老戲骨，睇得到佢絕對有潛質演喜劇做阿姐。」
近期王晶簽了謝婷婷做打女，影壇又加入不少新晉o靚模，成為競爭巿場，黃百鳴坦言：「我當然想簽Baby啦，但佢大忙人，總之下套都會預佢一份。」
Angelababy片中會有一幕女扮男裝戲，又要在幾度低溫跳河，冷得她牙關打震，但其專業精神獲老闆黃百鳴賞識。Angelababy對該片抱有期望，見到老闆即賣口乖說：「希望電影收得好，老闆發大財。」
拍戲講心唔講金
Angelababy親證拍戲時曾有NG，但次數不多，雖然拍戲一個月內Angelababy忙得冇覺好瞓，但她仍然期望再跟老闆合作，那麼屆時片酬會否飆升？她說：「我覺得拍戲好好玩，由細到大都會接觸，好似種子埋藏咗一樣，家係開咗花，所以根本冇諗幾多錢。」
採訪：卓寶花 攝影：陳慧安
服裝：IZZUECOLLECTION
場地提供：8壹8BAR
