聖誕節未到，股海似乎已見套現潮，大市連跌第5日，市場好似啱價就乜都沽咁款，大市成交金額比前日急增一成至820億元，唔少散戶見愛股受大市拖累而下挫，都心感不妙，忽然之間好想放假。
放假還放假，股票一樣要炒。市場一直有消息，力寶華潤（156）短期內將有大動作，坊間傳有大行吼實力華，周初一度炒上0.265元，創52周高位。
力華今次升浪由11月下旬0.18元水平起步，升過一輪後整固消化其實好正常，該股昨日冇升跌，平收0.234元。
力華主要在中港及新加坡等地投資和發展地產，兼營零售消費業務，可謂食正近年資產大膨脹。此外，其在內地之百貨業務亦受惠中央推動內需，未來將為集團帶來理想收益。
集團09年度（12月年結）中期業績，營業額1.85億元，升2.1%，盈利則下降26%至1.75億元，但相比08年全年「見紅」，蝕逾4億元已明顯改善好多。截至中期結算，集團資產淨值32.4億元，每股NAV達0.35元，若計入其他業務，應唔止呢個數，伺機買入，首站目標0.35元，以0.20元止蝕。
方星俠