大市陰陽怪氣，醒目仔要識走位，炒股唔炒市。每隻股都有自己特性同波幅區間，所以「炒生不如炒熟」。熟悉嘅中石化（386）又再回到7月底以來波幅嘅底部，呢個位足足出現咗近5個底部支持，股價喺10月15號7.25元開始，回落至6.4元，跌咗12%，到達呢啲位，跌穿就大件事要止蝕，唔穿就望一成升幅。簡單散戶智慧，咁樣博吓好過接內銀股跳涯式下跌嘅利刀。
散戶一般以為中石化股價同油價相反走，但點解油價跌至10月以來低位，中石化股價仍咁差勁？最近中央電視台報道，包括中石化、中石油（857）等油公司賤賣出口成品油，比國內零售價平36%，消息喺內地引起極大回響，拖累埋股價。
其實出口價同零售價比，即係蘋果同橙比，不能作準，因為出口價係煉油廠嘅出廠價，唔包括稅金同國內流通費用；若扣晒有關費用，出口價根本同內地出廠價差無幾。仲有係成品油除咗汽油同柴油，仲包括燃料油、石腦油同航空煤油等，當中燃料油平過汽油60%，直接拉低成品油價。中國自己都唔夠油用，又點會亂咁賤賣。
兩大威脅唔使怕
另一個利淡因素，係市傳將按成品油機制減油價，但同樣係唔使咁驚。北京市郊油站早已開始打減價戰，戰場仲延伸至中石油、中石化等大油站，其實油公司根本一直都冇賣到上限油價咁貴，而批發價與零售價之間仍有每噸800至900元人民幣差距，既然有空間，減價促銷唔出奇。另外，新環保標準嘅國III油將於元旦後，率先喺廣東、福建、浙江、河北、天津和青島等9個省市強制推廣，油公司只係促銷舊配方清貨尾，而新配方會賣貴好多，屆時利錢亦多啲。
胡孟青