王秀琳（Mango）自從與郭富城傳出緋聞後，其名字經常與城城扯上關係，Mango更因城城帶挈而工作量大增，難怪她無論何時何地都愛將城城掛在口邊，前晚出席髮型活動時，Mango又揚言會支持香港電影欣賞《風雲II》，但提到有冇聯絡城城時又避重就輕說：「有冇聯絡都好，都係朋友。」認真玄妙。
王秀琳、鍾鎮濤（阿B）、鄧紫棋（G.E.M）、張美妮等前晚到中環出席髮型展，眾人即場演繹潮爆髮型，頭戴誇張假髮及化妝的Mango自爆今次是義務幫手，所以沒有酬勞。
「冇聯絡都係朋友」
事實上Mango自從被撞破搭郭富城的順風車後，兩人即傳出緋聞，搞到城城的正印女友熊黛林（Lynn）和她不時隔空罵戰，最後Lynn護城成功，並獲城城公開表示Mango僅屬普通朋友，不過Mango卻因城城帶挈而工作量大增，出席活動時最愛不停提着城城。
近日城城主演的《風雲Ⅱ》上映，Mango前晚就坦言會支持香港電影欣賞《風雲Ⅱ》，至於是否支持城城時，她就說：「我鍾意彭氏兄弟，如果去睇會自己買飛囉。」
不過提到和城城是否有聯絡時，Mango卻避重就輕說：「有冇聯絡都好，都係朋友，冇乜所謂，唔代表啲乜嘢。」
阿B禁慾飲生髮水
同場的阿B和司儀王賢誌就在台上大講有味爛gag，王賢誌笑指阿B頭髮濃密，阿B即抵死笑言飲了生髮水，並說：「我女朋友大咗肚，我要㩒吓我啲慾火，唔係唔出呢度（指頭髮），就出喺第二度。」王賢誌即笑指其他地方就要靠自己修剪。
此外，G.E.M早前拍廣告時以LadyGaGa造型示人，不過就表示無意效法她在舞台上的性感演出，她說：「自己驚火，如果玩gimmick就會玩水，亦都唔會着泳衣，因為肥，等我減到冇晒byebye肉先會着，底線係比堅尼。」
採訪、攝影：魯萍
