白鴿黨阿甘向女助理表白，卻因神女無心而搞出個大頭佛，有人話畀八方知，實情阿甘好重視呢段僱傭關係，因此向王麗珠表白嘅場地，都經精心挑選，希望喺羅曼蒂克氣氛下，突破一般上司、下屬關係，可惜瀨嘢而回。
暴躁脾氣似有收斂
據講阿甘選擇喺中環國金一間高級餐廳向王麗珠表示好感，熟識阿甘人士都知，佢點睇都唔似係好識女仔嘅人，請女助理去高級餐廳食飯，果然係非一般飯局，之不過呢餐飯令佢食檸檬而回，仲惹上一身蟻㖭。
一度「春色無邊」嘅甘乃威議員辦公室，近日復歸平靜，自王麗珠被炒，另一女秘書求去，據八方所知，阿甘近日已請到新職員，一名女士接手秘書工作，白鴿黨中人指阿甘知錯能改，對新職員十分克制，無好似以前咁動輒斥責職員，暴躁脾氣看來真係有所收斂。不過對職員幾好都係假，職員MSN唔online都係被炒理由，相信好多打工仔都聞所未聞囉。