香港人做事爭分奪秒，就連喺自動櫃員機提款、轉賬、繳費都要喺最短時間內完成。為咗縮短排隊時間，獅子行滙豐率先喺今個月初引入個人化設定輕觸式自動櫃員機，除咗以輕觸式介面操作之外，仲大大簡化操作流程，華華試過，用預設嘅「特快提款」服務，由入卡到拎錢走人，都只係要20秒，而繳費就仲方便，只要係繳交中電（002）、煤氣（003）等10家指定商戶嘅費用，只要將單上嘅Barcode嘟一嘟，確認銀碼之後就搞掂。
滙豐香港區個人理財業務直接服務網絡主管趙慕賢話，現時有12部新款櫃員機分佈喺7個試點，希望3年之內，全線網絡都設有呢部新款櫃員機。