中國四大銀行，淨係差農業銀行一間未上市，對佢哋家寶號何時IPO，雖然外界只係得個等字，但有關農行嘅一舉一動，各界絕唔敢怠慢，好似佢哋旗下新設立嘅投行──農銀國際控股，噚日就喺金鐘海富中心辦事處，舉行正式成立典禮，呢個盛會冇請到新聞界參加，之不過廣告板海報就已經鋪天蓋地，幾乎所有本地大中型商銀同國際投行，都齊歡唱同慶賀。
曾俊華陳德霖現身
出席朝早酒會嘅人，亦係冠蓋雲集，包括財爺曾俊華，無負責監管農銀國際（並非認可機構）嘅金管局總裁陳德霖，亦都畀面出席，華華聽聞，如果呢次係農行董事長項俊波主持，煲呔可能都會現身。
噚日嘅成立慶典，由農行副行長楊昆擔大旗，之不過全力統籌農行上市嘅副行長潘功勝，就未有嚟港，相信唔少投行會有啲失望。
講番本地註冊嘅農銀國際控股，雖然呢個殼暫時真係得個殼，旗下只得一間揸住港交所（388）經紀牌嘅奀豬證券行──農銀證券，但係有心人話，四大行裏面嘅中行（3988）、建行（939）同工行（1398），都各自喺香港設立咗投行，農行喺國內排名，僅次於全國最大嘅工行，又點可以執輸失威，他日農銀國際好可能會伺機收購，做大投行生意，或者搞吓私募基金，周圍吓投資機會，此乃非常合理嘅推斷。
李華華