果然杜拜世界財困只係序幕，單係「棕櫚島」項目建築公司，因為樓價跌咗一半，上半年接受政府8億美元（下同）注資後，仍要蝕36億元，淨現金得番億幾，點夠發展，地盤實變爛尾樓。阿布扎比唔肯無限量支持，杜拜酋長只得售產套現。杜拜世界可以話牽一髮動全身，政府旗下其他公司嘅信貸水平亦被質疑，慘被CallLoan。
周身蟻係屬於杜拜酋長嘅杜拜控股，目前累計舉債接近100億元，其中有近20億元將於2010年到期。穆迪即時下調杜拜控股嘅評級，僅比垃圾級高出兩個級別。杜拜控股好可能步AIG後麈，唯一唔同，係唔會有政府打救，因為杜拜自身難保，所以賤賣資產肯定事在必行。杜拜控股控有當地20間巨企，涉及地產、醫院、金融、能源、教育、娛樂（包括環球片場、SixFlags等多個主題公園）、傳媒等範疇，簡單嚟講係整個經濟。
光伏產業有隱憂
資產大幅減值，雖未至於資不抵債，但無論政治或實事求是角度，要賣梗係先賣海外資產化算啲。目前公司控有海外資產都唔少，包括美國車廠克萊斯勒、EADS、全資持有英國Travelodge，還有70%杜拜銀行股權。外國傳媒幫手造低個市，上一輪風波先大大聲聲話冇事，如今卻打倒昨日的我，話希臘主權評級被調低，俄羅斯以至東歐債務都可能出現問題，擔心到時歐洲央行係咪會將債務孭上身，有機會演變成另一場金融災難。
前後兩星期唔夠，媒體對事件取態竟然有180度轉變，散戶好友又成為大戶獵物。因近日美元縱反彈，仲要一個藉口洗牌玩過，不過要小心，內銀保險已走晒樣，龍源電力（916）暗盤亦無力挽，炒新能源影子概念行唔通。
杜拜事件反映一個現象──唔止中國，全世界都係產能過剩，資產價格被炒高只因大戶熱錢作怪，眼前歌舞昇平只屬假象。
就連中國光伏巨企賽維，最近亦被海外最大買家Q-Cells終止供貨合同，據講雙方合資嘅發展計劃亦已泡湯，姑且睇吓起緊嘅中國第一大敦煌10兆瓦光伏電站，能唔能夠為業界帶番啲生氣。
胡孟青